ලේ දන්දීම විදෙස් රටකදි 20-Dec-2024 

මාස කිහිපයකට කලින් සිදුකල පුණ්‍යකර්මයක්. 

ඇස්, ඉස්, මස්, ලේ දන්දීම යනු එක්තරා අයුරකින් උප පාරමිතාවකි... අප මහා බෝසතුන් මේ මහා සාගරයට වඩා ලේ දන් දෙන්නට ඇති... ඒ මහා පුරුෂයාණන් මෙන් පෙරුම් පුරනා බෝධිසත්වයන් නොවූවද අපත් කෙදිනක හෝ දෙව් මිනිස් සුගති සැප කෙලවර නොපමාව මේ සසර ගමන නිමකල යුත්තේමය... 

කල පුණ්‍යකර්මයක් නැවත නැවත සිහි කරනා වාරයක් පාසා ඇතිවන්නේත් කුසල සිතක්මයි.. (පූර්ව, මුඤ්චන, අපර ලෙස කුසල් සිත් ඇති වේ)

සිහිවන වාරයක් පාසා කුසල කර්මයක් සැප විපාකම ජනිත කරයි. කර්මය කර්මඵලය විශ්වාසයෙන් කරනු ලබන කුසලය තවත් අනර්ඝ වේ... පෞද්ගලික ලාභ සත්කාර වාසි නොතකා හුදෙක්ම දානමය අරමුණකින්ම කරනා විට තවත් අනර්ඝ වේ...

නැවත මෙය මෙලෙස සඳහන් කරන්නට සිත් වූයේම මෙහි මෙලොව වශයෙන් සැප විපාක මා වෙත කල් නොගෙවාම ලැබූ බැවිණි... මානසිකව පමණක් නොව ශාරීරිකවද දුර්වලව සිටි අවස්ථාවක වුවත් ලාභ ප්‍රයෝජන නොතකා, විදේශයකදී වුවත්, අවස්ථාවක් ලද වේලෙහි, හුදෙක්ම දාන සිතකින්මයි මේ ලේ දන්දීම සිදුකලේ... එයම හේතුවක් වී සැප විපාක දෙමින් නැවත පෙර අයුරින්ම කායිකව යහපත් තත්වයක් හිමිවිය... 

මා දන් දුන් රුධිරයෙන් කවරෙකුගේ හෝ ජීවිතයක් සුරැකේවා යන අභයදාන සිතිවිල්ලද එසේම විය...

නැවත් ශ්‍රී ලංකාවට පැමිණි දිනෙක (ජීවත්ව සිටියහොත්) අවම ලෙස ලේ දන්දීම් වාර සියයක් හෝ සිදුකරන්නට ඉටා ගත්තෙමි...

(මේ සිදුවීම නැවත සඳහනක් කරන්නට සිත්වූයේ, කල කුසලය නැවත නැවත සිහි කිරීම මා හට මහත් සුවයක්ම ගෙනෙනා බැවින්ද, මෙය කියවන ඔබත් උනන්දු වේ යැයි අදහස් කරමින්මය)

තෙරුවන් සරණයි..

▫️️ලේ දන්දීමේ ආනිසංශ ▫️️

🩸නීරෝගී ජීවිත ලැබීම

🩸දීර්ඝායුෂ ලැබීම

🩸පැහැපත් ශරීරයක් ලැබීම 

🩸ශරීර ශක්තිය ලැබීම 

🩸චිත්ත පීඩා දුරුවීම

🩸කොතනක ගියත් ආහාර, වස්ත්‍ර, බෙහෙත් ලැබීම

🩸කීර්තිමත් බොහෝ ප්‍රියමනාප පුද්ගලයෙකු බවට පත්වීම

🩸දිව්‍ය මනුෂ්‍ය සම්පත් ලැබීම

🩸දෙවියන් අතර ඉපදුනත් බොහෝ රූප සොබාවෙන් යුක්ත වීම 

🩸සැප සම්පත් අධික පුද්ගලයෙකු බවට පත්වීම 

🩸සසර ගමනේ විපත්වලදී පිහිටවන අය ලැබීම

🩸නිවන පිනිසම උපකාරී වීම